ОҚО-да индустрияландыру картасымен 20 жоба іске асырылмақ
Оңтүстік Қазақстан облысында индустрияландыру картасы аясында жалпы құны 40 млрд. теңгені құрайтын 20 жоба іске асырылмақ. Осы жобалардың нәтижесінде 1500-ден астам жұмыс орны құрылып, өнеркәсіп өнімінің көлемі 920 млрд. теңгеге жетпек. Бұл туралы облыс әкімі Ж.Түймебаев халыққа берген есепті кездесуінде айтты, деп хабарлайды облыс әкімінің баспасөз қызметі.
Аталған жобалардың бірі- «Амир-А» ЖШС-нің 7,5 млрд. теңгеге жылына 150 мың тонна металл өнімдерін шығаратын металлургия зауытының құрылысы. Зауыт іске қосылғанда 100 жаңа жұмыс орны ашылады.
Ал «Green Technology Industries» ЖШС-гі 6 млрд. теңгеге 208 жұмыс орнын қалыптастырып, жылына 50 мың тонна полиэтилен қалдықтарын қайта өңдеп, штапельді талшық шығаратын болады. «Аsia Trafo» АҚ-ы 15,9 млрд. теңгеге 220 жұмыс орнын құрып, кернеу сыныбы 110-220 кВт күштік трансформатор өндіретін болады.
Әкімнің есебінде мәлім болғандай «Оңтүстік» аймақтық инвестициялық орталығы арқылы 4 млрд. теңгеге шағын және орта бизнеске көмек көрсету көзделсе, жастарды қолдау мақсатында «Жас кәсіпкер» бағдарламасы жүзеге асырылып келеді.
